• Email: Этот адрес электронной почты защищен от спам-ботов. У вас должен быть включен JavaScript для просмотра.
  • Tel: (+992 37) 224-57-37 | (+992 37) 224-57-67

HomeПОЭЗИЯАскар Ҳаким

ИН ОЙИНАИ НУР КӢ БУДАСТ, КӢ БУДАСТ....

Ин ойинаи нур кӣ будаст, кӣ будаст,
К-аз оби рухаш чашмаи хуршед намудаст.
Оҳ, ин чӣ гузаштан зи бари мо ба хамӯшӣ,
Хомӯш, ки хомӯшии ӯ авҷи суруд аст.
Дар ғунчаи лабҳош агар бӯйи баён нест,
Шаҳр ин хабари тозаи ишқ аз кӣ шунудаст?
Хуш мераваду рафтани ӯ нест видоъе,
Ӯро, ки ба ҳар мақдами падруд дуруд аст.
Ӯ масҷиду дайреву куниште нашиносад,
Аммо ҳама афтода ба пояш ба суҷуд аст.
Гар дасти сахо мояи ноз аст башарро,
Ин ӯст, ки аъзои вуҷудаш ҳама ҷуд аст.
Ин банда, Худоё, чӣ Худоест, ки банда-ш
Буддоиву тарсову мусалмону яҳуд аст.
Як бор, ки бар боми фалак рафт, дигар рафт,
Ойини ҷаҳон гарчи фароз асту фуруд аст.
Он аст, ки аз рӯзи азал нест суқуташ,
Роҳе, ки кунад азм, суъуд асту суъуд аст.
Моро ҳама ин дидаи ҳайрон зи қафояш
Бо шавқу хитобе, ки кӣ будаст, кӣ будаст?!

                                                                  Аскар Ҳаким

ҒАЗАЛИ БӮСА

Шаб дар лабаш шукуфид як лолазор бӯса,
Шаб буду лолачинӣ, лаб буду кор бӯса.
Шаб буду хобу руъё саршори бӯсу оғӯш,
Субҳ омаду ҳақиқат ку он ҳазор бӯса?!
Эъҷози бӯсаи ӯ кай дошт навбаҳоре,
Ҷонро, ки сабзтар кард аз сад баҳор бӯса.
Эй торами гуҳарбор, бар ибрати лаби ёр
Чун офтобборон як бор бор бӯса.
То лолаи лабонаш гӯё кунад мани лол,
Садҳо забон, ки дорад дар ихтиёр бӯса.
Гунҷишки орзуям бошад, ки аз лабонаш,
Рӯзе ба ҷойи дона чинад ҳазор бӯса.
Дармони ҳар чӣ тарёк чун нест ғайри тарёк,
Дармони бӯсабеҳуш бошад ба кор бӯса.
Ин ёри бӯсахоҳат, к-аз бӯсае зи ҳуш рафт,
Ҳаргиз ба ҳуш н-ояд бо се - чаҳор бӯса.
Тадбири ҳушманди-ш дигар баҷуз ҳамин нест,
Тангаш гирифтан оғӯш додан ҳазор бӯса.

Аскар Ҳаким

КОНТАКТЫ

  • (+992 37) 224-57-37 | (+992 37) 224-57-67
  • Этот адрес электронной почты защищен от спам-ботов. У вас должен быть включен JavaScript для просмотра.
  • 734025, Республика Таджикистан, город Душанбе. проспект Исмоили Сомони 8
  • ФАКС (+992 37) 224-57-37